البي جي دي اللي وقع مع اسرائيل طلق على زعيم حماس اللي مفطح فقطر ب”المجاهد”. بنكيران تلفن لهنية اللي قال ليه: المقاومة بخير

حزب العدالة والتنمية وصف اسماعيل هنية رئيس المكتب السياسي لحركة “حماس” ب”المجاهد”. هاد الشي جا فعنوان مقال نشرو موقع الحزب الرسمي هاد العشية السبت 12 نونبر 2023: “ابن كيران يهاتف المجاهد إسماعيل هنية”.

فالمقال ان الامين العام لحزب العدالة والتنمية اتصل بهنية اليوم وقدم ليه التعازي بوفاة نجله وحفيدته وسماهم “شهداء”. وعزاه فما سماه “شهداء العدوان الغاشم و المتواصل منذ 35 يوما على قطاع غزة”

حزب بنكيران قال باللي متضامن بشكل كامل ولا مشروط مع حماس وندد ما سماه “بحرب الإبادة التي تشنها آلة الحرب الصهيونية على غزة، بتواطؤ مع دول الاستكبار العالمي، وعجز كامل للمؤسسات الدولية في ردع العدوان ووقفه”

وافاد البي جي دي باللي هنية قدر هاد الموقف واكد باللي المقاومة بخير “أنها تدير المعركة بما يخدم مصالح الشعب الفلسطيني في التحرر ودحر الاحتلال”.

طبعا هنية ما كاينش فغزة. عايش فقطر اللي عندها علاقة مع اسرائيل بحال عدد من الدول ولكن حتى حد ما يقدر يهدر عليها. عايش هنية حياة مفطحة وناس غزة مكرفصين. مليون ونص منهم خلاو ديورهم. عدد القتلى فيهم بعد اكثر من شهر فاتت 10 الاف مند بدء الهجوم الاسرائيلي ردا على هجوم حماس يوم سابع اكتوبر واللي قتلو فيها 1200 اسرائيلي وداو اكثر من 240 رهينة.

البي جي دي اللي سمى زعيم حماس “المجاهد” هو اللي وقع الاتفاق الثلاثي المغربي الاسرائيلي الاميركي. وقعو امينو العام السابق رئيس الحكومة السابق سعد الدين العثماني. اليوم بدل خطابو.